نقيب المسرحيين المغاربة الفنان مسعود بوحساين يصرخ غاضبا: المغرب يظلم فنانيه والشعبوية وعدم الإلمام بمتطلبات الحرفة تصب الزيت على النار
مراد المهوري
على إثر النقاش حول أحقية الفنان في الدعم الاستثنائي الذي أعلنت عن نتائجه وزارة الثقافة والشباب والرياضة قطاع الثقافة عبر موقعها الرسمي خرج الفنان المسرحي “مسعود بوحساين” بتدوينة على صفحته الرسمية بالموقع الاجتماعي “فايسبوك” تحت عنوان ” حساب العكايزات 1″ :
- مجموع دعم الفنون كلها (فنون تشكيلية، مسرح، موسيقى، فنون كوريغرافية ) أربع مليارات قل ميتين مليون والصرف لقطاعات لازالت ممنوعة من العمل إلى اليوم وهذا الدعم نفسه (الاستثنائي) ليس الا تدويرا لمبالغ كان من المفروض أن تصرف في دعوم عادية لو لم تكن الجائحة.
- دعم الصحافة المكتوبة في ظل الجائحة عشرومليار سنتيم وما كافياش
واش عندنا مشكل مع الفن ولا مع الرياضيات…هاد الشي مؤسف وكيخلع واش ربعة د المليار فلوس؟ إلى قسمتيها على عدد العاملين في المشاريع؟
وأضاف في تدوينة ثانية بعنوان “حساب العكايزات2” :
إلى حسبنا واحد شخص ذاثي أو معنوي خدا 16 مليون وخدم معاه عشرة د الناس…
-شحال غاتجي للمومن فالمعدل؟ - غتجي منيول وماية وستين الف ريال ألف ريال.
- ايوا قسم منيول ومية وستينلف ريال على عشر شهور دوز منها ثمن شهور ماضرب فيها الضربة
- غتجيه 26 وعشرين ألف ريال.
هذا بلا ما نحسبو تكاليف الانجاز وزيد وزيد…أما اللي ما خداو والو فلهم الله…المغرب يظلم فنانيه والشعبوية وعدم الإلمام بمتطبات الحرفة تصب الزيت على النار…شعبوية مقيتة كان من الممكن تفهمها لو جاءت على لسان أناس بسطاء، ولكن ان تأتي على لسان أناس محسوبون على الحداثة والنخبة فالأمر مقلق ومؤشر حقيقي على تفشي الإفلاس الحضاري والاجتماعي والحقوقي والأخلاقي.
ومن جانبه كتب زميله المخرج المسرحي “أمين ناسور” تدوينة بعنوان “باش نتفاهمو” مؤكدا ماجاء به زميله الفنان مسعودي بلحساين:
من حق المواطنين احتجوا علا دعم وزارة الثقافة و الشباب و الرياضة للفنانين فهاد الأزمة … حيت هكا كيبان ليهم و حتا واحد مخرج و شرح ليهم الأمر على حقيقته و طبيعته.. الوزارة لاحت داكشي بحال شي هم تفاكت منو و الفنانين ناضو كيضربو فبعضاتهم ها لي خدا وساكت هالي مخداش ومحيح ها لي معجبوش لحال و أعداء الفن لقاوها فرصة سانحة باش يضربو فقطاع خلق ليهم بلبلة من شحال هادي…..
دعم الوزارة لفنون المسرح و التشكيل و الموسيقى و الكتاب هو دفتر تحملات لتقديم خدمة عمومية للمواطنين المغاربة في إطار حقهم الدستوري في الثقافة أي تقريب الثقافة و الفن للمواطنين فابور يعني الفرق و الوكالات و االشركات الفنية كيدفعو ملفاتهم للوزارة و كتبت فيهم لجان مختصة و هي لي كتحدد لي حصل على هاد الدعم باش ينتج و يقدم منتوجو للمواطنين (و بلاما ندخلو فشكون كاياخد و شكون مكياخدش هاداك كلام آخر )و هاد الإطارات طبعا كيكون عندهم ممثل قانوني هو لي كتكتب سميتو….. بمعنى راه ماشي هو لي كايخد داك الدعم و كيديرو فجيبوو و كيكول للوزارة الله يخلف لا راه كيكون معاه فريق و خاصو يقدم عروض ديالو فمدن مغربية مختلفة و يخلص لي معاه و يوكلهم و يشربهم و يسكنهم فالجولة .. مثلا فالمسرح فرقة خدات 14 مليون عدد العاملين فيها غير 10 ديال الناس ما بين4 ممثلين و2 تقنيين و1 اداري و 1مخرج و 1سينوغراف و1 مصممة ملابس متفاهمين و خاصهم يقدمو 5 عروض في مدن مختلفة ….. الممثلين كيتخلصو 1500 للعرض ضربها فربعة ستة آلاف درهم ضربها فخمسة هي 30000 درهم كل ممثل فيهم جاتو 7500 و المهنة ديالو غير المسرح مخدام فسياحة ولا فشركة كيشد 2000 فالشهر ما هو من صحاب الراميد كيشد 800 و لا 1200 فشهر… من شهر 3 و هو كالس مقرقبهاش يعني 7أشهر كيفاش عاش فيها الله أعلم جا حتا لشهر عشرة و غيشد غير النص من هاد 7500 و النص لاخور حتا يدوز مع فرقتو العروض .الا قسمنا هاد المبلغ علا سبعة الأشهر العجاف غتجيه 1071 درهم فالشهر مخداهاش بحال خوتو الغاربة فراس كل شهر لا دار بيها دارت مع الدولة و غتعطيها ليه علا دفعتين تفهمنا… و أجي نكملو باقي الفريق واحد التقنيين الله يكون فعونهم عندهم 1000 فالعرض و هما جوج هي 10000 و بلا ما نقسموها علا 7العجاف حيت حشمت منهم…. زيد عليهم الاداري و المخرج و المصممة و السينوغراف تعويضهم الجزافي جملة 60000 ….متبعين معايا شحال بقا 40000 درهم الخير و البركة…. حلو المسارح و كورونا العدوة بدات تغبر و بدا كيجي الجمهور و غيبداو الجولة.. الفرقة فالرباط و خاصها دير خمسة عروض فخمسة مدن كيفما جا فدفتر التحملات… قلبو علا تواريخ خاوية فالقاعات المسرحية لقاو فمكناس و الدار البيضا و بني ملال و مراكش و تازة…. الديكور خاصو ترنسبور ديالو لي غيهزو يعني صطافيت و لا بيكوب و لا حتا هوندا تراجي ديال هاد المدن الا دار معاك مول ترسبور مزيال غيسوا 15000 درهم.. شوف نتا غا ملي كتهز رحيل من حي ل حي شحلال كيطلب ليك…. ترنسبور ديال الفريق بالمقاتلا و المزاوكة و جيب نتا طوميبلتك و نت طموبيلت خوك…. 6000 درهم.. شحال وصلنا فطوطال 121000 …شحال بقا من ربعطاش لمليون 19000 درهم وخا…. عندك فهاد المدن ثلاثة مدن خاصك تبات فيهم يعني جوج ليلات نهار قبل العرض و نهار العرض حنا نديرو غير اطيل 2 ايطوال 300 درهم الواحد ضربها في ستة ليال غتعطيك 18000درهم و متنساوش راه الشيفور كيبات حتا هو زايد…. يعني شحال بقا 1000 درهم وباقي مهضرنا علا الماكلا و علا الطوارئ خاصك بولة خاصك خشب خاصك شي طرف توب خاصك قنبة تشنق بيها راسك…. أنا أتفق أنه أحيانا ينال الدعم من لا يستحقه و أحيانا يظلم فنانين عندهم ما يكولو و لكن هادا لا يعني أنه تعلقو الفنان و تبقاو تسلخو فيه كتر ما هو مسلوخ بحالو بحال العديد من أبناء هاد الوطن طالعا هابطا و حتا بحال السياسي بحال البناي بحال البوليسي بحال مول الحانوت فيه و فيه… فإلا غنتاقدو باش نقادو ماشي باش نريبو…… سلام عليكم
في سياق متصل تدوال العديد النشطاء عبر منصات التواصل الاجتماعي ” فايسبو، واتساب، أنسغرام…” فيديو للفنانة “لطيفة رأفت” توجه انتقادا لاذعا لوزير الثقافة وتعتبر الدعم الموجه لبعض أشباه الفنانين وشركات إنتاج منكرا وأنه وجب توزيع المليار و400 مليون على الفنانين المتضررين من الجائحة الذين لا يجدون ما يسدون به رمق عيشهم وان بعض الفنانين استفادوا لأكثر من مرة من هذا الدعم وهذا ينافي شروط الاستفادة كما وجهت نداء للذين استفادوا من الدعم بأن يكشفوا عن إنتاجاتهم الفنية التي لم نسمع بهاأبدا أو لم ترقى إلى المستوى المطلوب.
